ENCONTRO DE CANTAREIRAS

En Airiños de Fene temos moi claro que a nosa historia, a nosa identidade como pobo e a nosa cultura, mantivéronse ata a actualidade gracias ás nosas mulleres.

É por iso que aló polo ano 2012 decidímonos a renderlles a nosa humilde homenaxe organizando o I Encontro de Cantareiras co firme propósito de darlle continuidade no tempo e chegar polo menos ás mesmas edicións que a Xuntanza de Gaiteiros.

Son as Cantareiras o piar fundamental da nosa música tradicional e gracias a elas, que de maneira xenerosa e desinteresada abriron as portas dos seus fogares para ensinar todas aquelas cantigas aprendidas na súa mocidade , hoxe podemos presumir de ter un gran legado cultural e centos de grupos de cantareiras por todo o país que nos encargamos de manter vivo ese legado que elas nos cederon.

Queremos que o noso Encontro, sirva para dar a coñocer non só os grupos actuais que traballan pola nosa música e a nosa cultura, senón tamén para visibilizar a todas as mulleres que nos precederon e que tocaron antes que nos. Que sexa un lugar onde dar a coñecer a nosa riqueza musical e onde desfrutar do bo facer dos grupos que ano tras ano nos acompañan.

Dende aquí, agradecer a todas as pandereteiras que teñen pasado polo noso encontro e á ACDR Liga de Amigos de Barallobre pola súa colaboración e o seu apoio dende o primeiro momento no que nos decidimos a organizar este acto.