XUNTANZA DE GAITEIR@S

No ano 1989 comezamos a organizar o que hoxe coñecemos como “Xuntanza de Gaiteir@s”. O noso obxectivo con este acto é darlle á nosa música e á nosa cultura tradicional a importancia e o lugar que merecen.

A celebración da Xuntanza de Gaiteiros caracterízase polo tanto, por homenaxear a aquelas persoas, grupos ou asociacións que co seu traballo de recollida, recuperación ensino ou difusión, manteñen e dignifican a nosa música, a nosa cultura e a nosa língua.

Nos primeiros anos, a nosa Xuntanza, que se denominaba Xuntanza de Xoves Gaiteiros, homenaxeou a grupos tan míticos e importantes como “Os Veigas” ou os “Nenos do Eume”,que fundados entre os anos 40 e 50 e percorrendo cos seus instrumentos numerosas romarías, festas e camiños foron exemplo a seguir para formacións máis amplas e actuais como as bandas de gaitas. Tamén houbo lugar nesas primeiras edicións para homenaxear a grandes músicos como Antonio Leira ou Ramiro Couce, quen a partir das escolas de música municipais nas que daba clases fundou Airiños de Fene aló polo 1987 coa idea de ensinar a nosa música tradicional a toda a rapazada de Fene. A partir do ano 1998, coincidindo coa X edición, decidimos cambiar o seu nome e pasou a chamarse “Xuntanza de Gaiteiros”, aproveitando para denominala naquela ocasión “Memorial Ramiro Couce” servindo coma homenaxe ao noso fundador que nos deixara recentemente.

Dende aquel lonxano 1989, moitas son as persoas, grupos e asociacións que teñen pasado por Fene para recibir a nosa humilde pero sincera homenaxe e o noso máis afectuoso agradecemento por ter traballado tanto pola nosa música tradicional.

Longa vida á Xuntanza de Gaiteiros e a todas as persoas que a fixeron e a fan posible.